Уоррен Баффет
Уоррен Баффет – америкалық бизнес-магнат, инвестор және филантроп, Berkshire Hathaway компаниясының төрағасы және бас директоры. 2021 жылдың маусымындағы деректер бойынша оның байлығы 107 миллиард доллардан асты.
Баффеттің әкесі Говардтың жеке брокерлік фирмасы болды және ол бала кезінде, атап айтқанда 11 жасында, қор биржасынан алғашқы ақшасын тапқан. Мектеп оқушысы кезінде ол газет таратып, айына 175 доллар алатын болған. 1000 доллардан астам қаражат жинап, жер учаскесін сатып алып, оны жалға бере бастаған. Мектепті бітірген кезде жас Баффет 10 000 доллар жинаған.
Болашақ миллиардер жақсы экономикалық және іскерлік білім алды — ол Пенсильвания университетіндегі Уортон бизнес мектебінде, Небраска университетінде, Колумбия университетінің бизнес мектебінде және Нью-Йорк қаржы институтында оқыды. Колумбия университетінде Баффет өзіне қатты әсер еткен және іргелі талдау арқылы дана инвестициялаудың негізін қалаған атақты американдық экономист және инвестор Бенджамин Грэмнің жетекшілігімен білім алған. Біраз уақыт Баффет Грэмнің қорында жұмыс істеді, ал Грэм зейнетке шығып, бизнесін жапқаннан кейін, осы уақытқа дейін шамамен 174 000 доллар қаражат жинаған Баффет өзінің жеке инвестициялық қорын – Buffett Partnership – ашуға шешім қабылдайды.
Инвестициялық сезгіштік қабілетінің арқасында Уоррен Баффетті «Оракул» (оракул – болашақты болжағыш) деген лақап атпен атаған. Ал 1962 жылға қарай ол миллионер болды. Сол жылы ол қираған Berkshire Hathaway тоқыма мануфактурасының акцияларын сатып ала бастады және үш жылдан кейін бақылау пакетінің иесі болды. Баффет компанияның мақсатын өзгертуге және сақтандыру нарығына шығуға шешім қабылдады. Соңғы тоқыма фабрикасы 1985 жылы жабылды.
Баффет көптеген танымал әлемдік компаниялардың акцияларын алған: IBM, Coca-Cola, American Express, McDonald’s, Kia Motors, BNSF Railway және т.б.
Уоррен Баффет – танымал филантроп. 2006 жылы ол 37 миллиард долларды қайырымдылыққа аударды – оның көп бөлігі қайырымдылық жұмыстарымен белсенді айналысатын досы Билл Гейтстің қорына кетті. 2009 жылы достар «Сыйға беру анты» науқанын бастады, онда олар әлемдегі ең бай адамдарды өз байлығының кем дегенде жартысын игі мақсаттарға беруге шақырды. Баффеттің өзі байлығының 99% -ын тірі кезінде немесе қайтыс болғаннан кейін қайырымдылыққа беруге ант етті.
Баффеттің көптеген хоббилері бар. Мысалы, ол укулеле – гавай гитарасында ойнағанды ұнатады. Қартайған шағына қарамастан Баффет әлі де өз компаниясын өзі басқарады.
Психолог Лео Бабаута Омахадағы Berkshire Hathaway акционерлерінің әйгілі жыл сайынғы жиналыстарының бірінде Баффет пен оның көптен бергі досы әрі серіктесі Чарли Мунгердің артынан бақылап, белгілі инвестордан үйлесімді өмірдің 5 сабағын түйіндеді.
«Олар дүниенің барлық байлығына ие болып, барлық мәселелері шешілгендіктен ғана емес, өмірге қанағаттанудың негізгі принциптерін түсінгендіктен де соншама жайбарақат өмір сүруде. Бұл, меніңше, супер күш», — деп жазды ол.
Дайындаған Бақытжан Салихов
