Дүниежүзілік философия күні
Дүниежүзілік философия күні жыл сайын қарашаның үшінші бейсенбісінде аталып өтіледі. 2021 жылы бұл күн 18 қарашаға дөп келді. Осы мерекемен сіздерді де құттықтаймыз.
Дүниежүзілік философия күні (World Philosophy Day) 2005 жылы ЮНЕСКО Бас конференциясының 33-сессиясында жарияланды және дүниежүзілік қоғамдастықты жаһандық деңгейдегі философиялық ойдың байлығымен таныстыру мақсатында жыл сайын өткізіледі.
Философия шындық пен болмыстың табиғатын, нені білуге болатынын, дұрыс және бұрыс мінез-құлықты зерттейді. Ол гректің phílosophía сөзінен шыққан, «даналыққа деген сүйіспеншілік» дегенді білдіреді. Бұл адам ойының ең маңызды салаларының бірі, өйткені ол өмірдің мәнін түсінуге ұмтылады.
Дүниежүзілік философия күнін белгілеу идеясы қоғамда болып жатқан жаһандық әлеуметтік-мәдени өзгерістерді талқылау үшін ортақ алаң табу, адамдарды философиялық мұрамен таныстыру, жаңа идеяларға күнделікті ойлау аясын ашу және қоғамдық пікірталастарды ынталандыру бағытында маңызды.
Көптеген ойшылдар философияның мәні таң қалдыру дегенді алға тартады. Ал шын мәнінде философия адамның өзіне және өмір сүріп жатқан әлеміне қызығушылық танытуға деген табиғи ұмтылысынан туған. Философия даналыққа деген көзқарас пен сүйіспеншілік ретінде бізді ойлауға, негізгі шындықты зерттеуге, алғышарттарды тексеруге және өз қорытындыларымызды жасауға үйретеді.
Ғасырлар бойы әртүрлі мәдениеттерде философия түсініктерді, идеяларды және ақпаратты талдау жұмыстарын тудырып, сыни, тәуелсіз және шығармашылық ойлаудың негізін қалады.
Бүгінгі таңда Философия күні дүние жүзіндегі ЮНЕСКО-ға мүше 70-тен астам елде атап өтіледі. Жыл сайын белгілі бір тақырыпқа арналған бұл күні әртүрлі іс-шаралар (жергілікті, республикалық және халықаралық деңгейде) өткізіліп, ұйымдастырылады: философиялық диалогтар, пікірталастар мен дөңгелек үстелдер, конференциялар мен семинарлар, көрмелер мен тұсаукесерлер, жаратылыстану және қоғамдық ғылымдардың барлық салаларының философтары мен ғалымдарының, мұғалімдердің, студенттердің, мәдениет, білім беру, БАҚ және қалың жұртшылық өкілдерінің қатысуымен бүгінгі күннің ортақ тақырыбы аясында басқа да мәдени іс-шаралар өткізіледі.
